ഒന്‍പതാം ക്ലാസുകാരിയുമായി നാടുവിട്ടു, പീഡനം; യുവാവ് പോക്‌സോ കേസില്‍ അറസ്റ്റില്‍

ചൊക്ലി(കണ്ണൂര്‍): ഒന്‍പതാംതരം വിദ്യാര്‍ഥിനിയെ പ്രലോഭിപ്പിച്ച് കൂട്ടിക്കൊണ്ടുപോയി പീഡിപ്പിച്ച യുവാവിനെ ചൊക്ലി പോലീസ് അറസ്റ്റുചെയ്തു. മട്ടന്നൂര്‍ ചാവശ്ശേരിയിലെ പി.കെ.ഹൗസില്‍ മുഹമ്മദ് സിനാനിനെ(21)യാണ് പോക്‌സോ നിയമപ്രകാരം ഇന്‍സ്‌പെക്ടര്‍ സി.ഷാജു അറസ്റ്റുചെയ്തത്.

കഴിഞ്ഞ പത്തിന് കുട്ടിയെ കാണാനില്ലെന്ന് കാണിച്ച് രക്ഷിതാക്കള്‍ നല്‍കിയ പരാതിയില്‍ കേസെടുത്ത് അന്വേഷണം ആരംഭിച്ചിരുന്നു. ഫോണ്‍ നമ്പര്‍ പിന്തുടര്‍ന്ന് പോലീസ് നടത്തിയ അന്വേഷണത്തില്‍ ഹൈദരാബാദിലുണ്ടെന്ന വിവരം ലഭിച്ചു.

ബെംഗളൂരു, ഹൈദരാബാദ് എന്നിവിടങ്ങളില്‍ കൊണ്ടുപോയി കുട്ടിയെ കൂടെ താമസിപ്പിച്ച് പീഡിപ്പിച്ചുവെന്നാണ് പരാതി. മട്ടന്നൂരില്‍ ഫോണ്‍കടയില്‍ ജോലിചെയ്തിരുന്ന സിനാന്‍ പെണ്‍കുട്ടിയെ പ്രണയം നടിച്ച് പ്രലോഭിപ്പിക്കുകയായിരുന്നു. തലശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.